SAAN KA NAUUHAW?

Summer na naman! Mainit na namn ang panahon. Nakakauhaw. Naalaala ko tuloy iyong commercial sa telebisyon tungkol sa isang brand ng softdrink “Obey your thrist.” Ang pagkauhaw ay karaniwan nating nararanasan kapag ang ating katawan ay nagkukulang sa tubig. Ito ay isang natural na tugon ng katawan. Kapag nararanasan natin ang matinding uhaw tila baga hindi tayo mapakali hangga’t hindi ito naiibsan. Katulad ng pagkagutom sa pagkain, gagawa at gagawa tayo ng paraan upang mapawi ang hapdi ng sikmura o pagkatuyot ng lalamunan.  Sa sandaling ang matinding pangangailangan ito ay makamtan, makakaranas tayo ng pansamantalng kaginhawaan.

Ang pagkabalam na maibsan ang pagkauhaw ay nagbubunga ng init ng ulo.  Sinumbatan ng mga Israelita si Moses (unang pagbasa). Inakala nila na walang patutunguhan ang kanilang paglalakbay kaya naisip nila na mabuti pa sana ay hindi sila umalis sa Egipto. Naramdaman ni Moises ang kanilang kalagayan kaya’t siya ay taimtim na nanalangin. Dininig siya ng Diyos, ang bukal ng pagpapala.

Sa ating Banal na ebanghelyo, nasaksihan natin si Hesus bilang tunay na tao ay nakadama ng pakauhaw. Ang balon na ibinigay pa ni Jacob ang siyang naging saksi sa pakikipag-usap niya sa Samaritana. Bilang panimula ay humingi siya ng tubig sa Samaritana na siya naming ipinagtaka ng huli. Hindi niya ito akalain sapagkat hindi niya inaasahan na ang isang Hudyo ay makikipag-usap sa katulad niyang Samaritana ( ng maganadang balita ng kaligtasan ay para sa lahat ng lahi). Sa kanilang pag-uusap ay dahan-dahang nabuksan ang isipan ng Samaritana hanggang siya naman ang humingi kay Hesus ng tinutukoy ay buhay na tubig.

Ano po ba ang ibig sabihin ng buhay na tubig?  Sa ating ikalawang pagbasa sa sulat ni Apostol San Pablo, sinasabi niya sa mga taga roma ang ganito, "Sa pamamagitan  nga niya’y tinantamasa natin  ang kagandang- loob ng Diyos. Hindi tayo nabibigo sa ating pag-asa, sapagkat ang pag-ibig ng Diyos ay ibinuhos sa ating mga puso sa pamamagitan ng Espirito Santo na ipinagkaloob sa atin”. Ang Diyos mismo  ang Siyang bukal ng buhay na tubig na ito. Siya ay “nauuhaw”  na maibahagi ito sa atin sapagkat wala siyang hinahangad kundi ang kaligtasan.

Sa ating pang-araw-araw na pamumuhay, nauuhaw tayo sa maraming bagay. Nauuhaw tayo sa kayamanan, karangalan at kapngyarihan. Marami sa mga kabataan ang nauuhaw sa ipinagbabawal na gamot. Ang iba sa atin ay uhaw na uhaw sa pagtetext, at marami pang iba. “Don’t just obey this kind of thrist”.

Ngayong panahon ng Cuaresma, inaanyayahan tayo na talikdan ang mga huwad na paguhaw. Maging uhaw sana tayo na mapanumbalik ang magandang pakikipag-ugnayan sa ating kapwa sa pamamagitan ng pagpapatawad. Maging uhaw sana tayo na linisin an gating kapaligiran at mahalin nag kailikasan. Maging uhaw sana tayo sa pagdarasal.

Higit sa lahat magbigay tayo ng malinis na tubig sa mga kapatid nating nauuhaw.

Rev. Larii Asilo,OMI

Grace Park Cross March 3, 2002