NASA PANIG NATIN ANG DIYOS

Ang bundok ay isa sa mga natatanging lugar sa Bibliya na kung saan si Hesus ay madalas na nangangaral sa mga tao. Sa ebanghelyo ngayon, makikita natin na si Hesus ay umahon sa bundok matapos na Makita ang napakaraming tao at siya ay nangaral.Sa Lumang Tipan ay palagi nating matutunghayan na madalas na magpakita ang Diyos sa bundok. Sa bundok ng Sinai nakipagtagpo si Yahweh kay Moises at dito rin ibinigay ni Yahweh sa Israel sa pamamagitan ni Moises ang Sampung kautusan (Eksodu 19-200.Si Moises ay nangaral mula sa bundok ng Sinai.

Kung alam natin ang kwentong ito at naman natin mula sa Ebanghelyo ayon kay Mateo na si Hesus ay nangangaral sa bundok ay biglang papasol sa isip natin na si Hesus ay inihahalintulad ni Mateo kay Moises. Si Hesus ang Bagong Moises; Siya ang Mambabatas na isinugo ng Diyos Ama upang tayo ay akayin patungo sa kanyang Kaharian katulad ng pag-akay ni Moises sa mga Israelita mula sa Ehipto. Kung ang pinakalaman ng mensahe ni Moises ay ang Sampung Kautusan, kay Hesus naman ay ang beatitudes.

Ano nga ba ang mensahe ng mga turo ng pagpapala o beatitudes? Simple lang. Ito ay tungkol sa NATATANGING PAGKALINGA NG DIYOS SA MGA NAGHIHIRAP! Kung ating susuriing maigi ang turo ng pagpapala ay makikita natin na ito ay nagtataglay ng mga pangako ng Diyos sa mga taong nakakaranas ng iba’t-ibang klase ng paghihirap. Subalit, mapalad ang mga mahihirap  hindi dahil sa kanilang kahirapan kundi dahil sa natatanging pagkalinga sa kanila ng Panginoon.Hindi sila mapalad dahil sa sila ay nasa miserable sitwasyon kundi dahil sa espesyal na atensyon na ibinibigay sa kanila ng Diyos.Ang atensyon na ito na ibinibigay ng Diyos ang siyang nagdudulot ng pagpapala at kaligayahan sa mga naghihirap. Marahil ay maitatanong natin ang ganito, ”Kung si Hesus nga ay may pagkalinga sa mga mahihirap at sa may mababang kalooban, bakit naghihirap pa rin sila sa kanilang buhay? “Simlpe lang ang sagot,hindi pa ito ang wakas. Ang pag-ibig at katarungan ng Panginoon ang siyang mangingibabaw..

Ngayong Linggo, lumalabas sa Ebanghelyo ang larawan ng isang Diyos na taga-pagtanggol ng mga inaapi; isang Diyos na inuuna ang mga lubos na nangangailangan katulad ng isang doctor na inuunang gamutin ang nasa bingit ng kamatayan kaysa mga nagpapakonsulta lang.

Napakasarap namnamin ang mensahe hated ngayon ng ebanghelyo. Sa gitna ng kahirapan na ating nararanasan sa buhay sinasabi ng Diyos sa atin na mapalad tayo sapagkat ang kanynag atensiyon ay nakabaling sa atin. Kung kaya sa panahon na tayo ay may mga mabigat na suliranin pinapaalalahanan tayo ng ebanghelyo ngayon na huwag tayong mawalan ng pag-asa sapagkat ang diyos ay nasa panig natin at patuloy na umaakyat upang tayo ay mahango sa kahirapan.Kung papaanong ang Panginoon ay kumikiling sa mga dukha,gayon din naman ang hamon sa atin. Tayo rin ay inaanyayahang bigyan ng pansin ang katayuan ng mga dukha at maging instrument ng kapayapaan sa ating kapwa.

Rev: Lari Asilo,OMI

Grace Park Cross February 3,2002